تناقلت وسائل الإعلام وبخاصة وسائط التواصل الإجتماعي أمس الأول مقطع فيديو لذلك (الورل) الذي هداه حظه العاثر للخروج من النيل ومحاولة قطع شارع الأسفلت ليصبح صيداً سهلاً للعربات التي كانت تعبر مسرعة مما أصابه بجروح جعلته ينزف دما أحمر قانيا توزع على أنحاء متفرقة من الأسفلت .
دعونا نتساءل (لماذا حاول الورل قطع الطريق؟) على وزن Why did chicken cross the road? (لماذا قطعت الدجاجة الطريق؟) وهو سؤال مشهور (في شكل لغز) على الرغم من أن الإجابة المنطقية عليه هي (لكي تذهب للضفة الأخرى من الشارع) لكنه يحتمل عدداً من الإجابات الأخرى التى لا تخطر على الذهن ، وهذه عزيزي القارئ عدداً من الإجابات على لسان مجموعة من (المشاهير) في تخصصات ومواقع مختلفة أعتقد أنك لن تجد كبير عناء في التعرف عليهم .

إجابة (1) :
الورل ده قطع الشارع عشان يوريكم الفرق قبل الإنقاذ وهسه ، قبل الإنقاذ البحر ده كووولو كان فيهو ورل واحد ، هسه شوفو فيهو كم ورل؟ البحر إتملأ (ورلات) لحدت ما بقت تقطع الظلط.
إجابة (2) :
أول حاجة ده ما ورل ، ده ملك من ملوك الجن الأحمر إتشكل في صورة ورل وكان عاوز يمشي يؤدي البيعة ، ولو قستو المسافة بين البحر وشارع الظلط القطعا ح تلاقوها 30 متر و21 سنتي ودي زي الفترة ال ح تحكم فيها الإنقاذ (30 سنة و21 يوم) بالضبط !
إجابة (3) :
أنا بفتكر إنو الورل ده قطع الشارع عشان كل زول فينا يسأل روحو .. هسه المغتربين ديل قاعدين بره يسووا في شنو؟ كل زول لابد وخايف من كفيلو؟ الزراعة دي خلوها .. الواحد فيهم ما يجي يتوهط ليهو في حجر قدام البحر ده ويرمي ليهو ساي رماي وللا سنارة ؟ كان طلع ليهو بس ورل واااحد في اليوم مش بيكون أفاد نفسو وأفاد البلد دي؟ وزي ما قال واحد صاحبنا أنا بفتكر كمان ممكن العزابة يعملو منو حلة (القطر قام) في البلد الخيرا راقد دي !
إجابة (4) :
الورل ده طبعن كان جاي من الناحية الشمالية الشرقية الغربية عكس إتجاه الريح وقام قطع الظلط بصورة مفاجئة مع أذان العشاء والناس في الصلاة وكان مغمض عيونو عشان ضوء العربات ما ينعكس عليهو .. أنا أطمئن الناس إنو من هنا وجاي الكلام ده ما ح يحصل لأنو نحنا ح نعمم تقنية الدفاع بالنظر على طول شارع النيل وأي ورل تاني يمد راسو ح نقطعو ليهو .
إجابة (5) :
كونو (الورل) ده يقدل في تص الشارع ده تفلت وزعزعة للأمن .. نحنا كلمناهم قلنا ليهم في تدهور في البيئة الحضرية .. أنا كنتا عضو مجلس قيادة ثورة وكونو الورل ده يقطع شارع النيل بالصورة دي فده كلام ما بشرفنا أبداً ولا ليهو علاقة بالحاجة الأنحنا قمنا من أجلها بالإنقلاب .
إجابة (6) :
شوف يا الطاهر .. الناس دي بتقول إنو قواتنا ليها علاقة بي قصة الورل ده .. ده كلام بتاع إشاعات ساكت .. قواتنا لو الورل ده تبعا ما بتخاف من شيء وما كان نكرتو .. وأي زول قال الورل ده تبعنا نحنا ما بنخليهو إلا يثبت لينا كلامو ده والناس البتقول كده ديل نحنا عارفنهم وبنوصل ليهم في مكانهم .

إجابة (7) :
للأسف إن خروج الورل بهذه الطريقة من النيل هو حالة من الفوضى التي تنذر بهزيمة القضية الديمقراطية، فقبل خروج الورل كان من المفترض أن يكون هنالك مؤتمر جامع بحيث يتم أولاً الإتفاق على موجهات تحدد كيفية قطعه للشارع على أن توقع على هذا الإتفاق جميع القوى السياسية ، أما خروج الورل إلى الشارع بهذه الكيفية فمن شأنه عرقلة عملية التحول الديموقراطي وتحقيق السلام العادل وما يرافقه من تنمية مستدامة .
إجابة (8) :
تلقيت قبل قليل اتصالا من الأخ مسؤول الحياة البرية يبشرني فيه بأن (الورل) في حالة طيبة وسوف يتم علاجه بأسرع من تيسر وقد إتضح بأنه (ورل) من فصيلة نادرة يمكن تصديره للخارج للمساعدة في زيادة الدخل القومي ومن ثم العمل على تثبيت سعر الصرف .. أعتقد أننا نسير في إتجاه (الورل) الصحيح .
إجابة (9) :
بموجب المادة 213 (أ) من قانون المعاملات (البرمائية) لعام 2009 فإنه لا يمكن بيع هذا الورل إلا عن طريق شيك معتمد يورده المشتري في حساب البائع على أن تحفظ صورة من الشيك في ملف (الورل) !!
إجابة (10) :
نحنا يا جماعة حصل قلنا ليكم (الورل) ده ما بقطع الشارع ؟ حصل قلنا ليكم الورل ده ما حيوان برمائي ؟ والله نحنا لا بهمنا ورل لا تمساح .. وما ح نتخلى عن الشريعة .. وما ح نسمح لأي (ورل) يجي يقدل لينا في الشارع ويقوم بترويع المواطنين والزارعنا غير الله الليجي يقلعنا والمتغطي بالورل (عريان) !!
كسرة :
الورل ده بيكون شاف ليهو (مخبز) ما فيهو صف !!
كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+ (وووووووووووو)+ (وووووووووووو)+ (وووووووووووو)+ (وووووووووووو)+ (وووووووووووو)+ (وووووووووووو)+(وووووووووووو)+و+و+و+و+و+و+و
• كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو (وووووووووووو)+ (وووووووووووو)+ (وووووووووووو)+وووووووووووو)+(وووووووووووو)+و+و+و+و+و+و+و+و

Advertisements