أولاً: نبارك النية .. ونسأل عن الطريق
نحي حكومة ولاية الجزيرة على التفكير في “الميناء الأخضر” بأم القرى وعلى خطة 8 مدن صناعية وعلى لقاء بنك تنمية الصادرات.
دي نوايا طيبة وخطط مستقبلية نتمناها تتحقق..
وحباب المستثمر وحباب الصادر.
لكن يا سعادة الوالي .. المواطن تعب من “طق الحنك”، ومن الأخبار الكبيرة وهو واقع في حفرة صغيرة.
ثانياً: أسئلة على قدر اللحاف
الخبر قال الميناء الأخضر في أم القرى. جميل.
طيب السؤال الأول المهني:
1. أين الطريق؟
هل الطريق الرابط أم القرى بالطريق القومي (مدني – بورتسودان) مؤهل؟
هل الطرق الداخلية للمحلية بتتحمل شاحنة واحدة للصادرات؟
أي حديث عن إستثمار في أم القرى قبل إعادة تأهيل الطريق الرابط هو تنظير وإستهلاك إعلامي. الشاحنة ما بتطير يا جماعة.
2. أين الكهرباء والبنية التحتية؟
داخل المحلية.. هل الكهرباء مؤمنة 24 ساعة؟ هل المياه؟ هل الإتصالات؟
الميناء الأخضر داير تبريد وتخزين وتغليف .. مش داير “مولد جاز”.
3. أين المواطن من الغلاء وعطش المحاصيل؟
فوضى الأسواق .. غلاء لا يوصف .. وعطش الصيفي في الغيط .
النفخ الإعلامي في الظروف دي أثره سالب. المواطن بيقول: “خلو الميناء .. فكونا من السوق”.
ثالثاً: 8 مدن صناعية؟ طيب القديمات وين؟
والله يا سعادة الوالي .. فكرة المدن الصناعية دي ما جديدة.
هي من زمن المرحوم د. محمد طاهر إيلا، وسمعناها كتير.
مقترحنا المهني البارد:
قبل ما نفتح 8 مدن جديدة .. تعالوا ندور القديم:
1. منطقة الباقير الصناعية بمحلية الكاملين .. مالها؟
2. منطقة مارنجان بمحلية مدني الكبرى .. واقفة ليه؟
3. منطقة مصانع شرق مدني.. فيها شنو الليلة؟
دور القديم .. أصلح القديم .. شغل القديم ..
بعد داك تعال قول لي 8 جداد. كده بنصدقك وبنقيف معاك .
رابعاً: بنك الصادرات .. خطوة في الإتجاه الصحيح
نشيد بعودة بنك تنمية الصادرات وفتح فروع في المناقل وبقية المحليات .
ونشيد بعودة نشاطه في الميناء الجاف بمدني. دي خطوة عملية ومباشرة .
وده هو المطلوب: خطوات صغيرة مضمونة بدل قفزات كبيرة في الهواء .
الخلاصة: نمد رجلينا على قدر لحافنا
يا حكومة الولاية .. نحن ما ضد الحلم .
نحن ضد “الفورة مليون” في زمن اللحاف قصير .
أولوياتنا اليوم:
1. إنقاذ العروة الصيفية من العطش.
2. ضبط السوق ومحاربة الغلاء.
3. تأهيل الطرق.. طريق واحد نضيف أهم من 8 مدن على الورق .
4. تشغيل منطقة صناعية واحدة.. أهم من 8 مدن في تقارير.
بعد ننجز ديل .. تعال قول لي ميناء أخضر ومدينة للذهب الأبيض.
وحتلقى الشافعي أول زول يهلل ويكتب قصيدة .
نحن ما مستعجلين .. لكننا عطشانين للواقع .
والله من وراء القصد